Ndikumana Hamad Katauti na Bonaventure Hategekimana batabarutse mu gihe kimwe

16/11/2017, Jean-Claude Mulindahabi

Ndikumana Hamad Katauti yitabye Imana ku buryo butunguranye buri bucye ari kuwa gatatu tariki ya 15 Ugushyingo 2017. Bonaventure Hategekimana « Gangi » wari umaze iminsi arwaye na we yitabye Imana uwo munsi. Aba bagabo bombi babaye abakinnyi bakomeye cyane mu mupira w’amaguru. Bombi bakiniye ikipe y’igihugu « Amavubi ». Katauti yanabaye kapiteni w’Amavubi. Katauti ari mu bajyanye Amavubi mu gice cya nyuma cy’igikombe cy’Afrika CAN mu w’2004. Yakinnye mu Mavubi hagati y’umwaka w’2008 kugeza mu w’2011. Katauti yakiniye ikipe ya Rayon Sports, ndetse yatabarutse yari asigaye ari umutoza wayo wungirije. Yatabarutse afite imyaka 39 gusa.

Bonaventure Hategekimana wari uzwi cyane ku izina rya Gangi yakinye mu makipe menshi kandi akomeye. Kimwe na Katauti na we yakinaga mu bakabiri kandi yakinnye no mu ikipe y’igihugu. Amapipe yakinnyemo ni APR FC, Rayon Sports, Police FC, Atraco, Kiyovu Sports, Mukura VS, Espoir, Marines, Etincelles, AS Muhanga FC na Musanze FC ari nayo yasorejemo.

Amwe mu mafoto ya Katauti Hamad Ndikumana:

Ndikumana Katauti mu myitozo ya nyuma ye na Rayon Sports kuri uyu wa Kabiri, mbere y’amasaha make ngo yitabe Imana

Ni umwe muri ba myugariro bakomeye u Rwanda rwagize mu mateka

Katauti yamaze igihe kinini akinira ikipe y’Igihugu Amavubi ndetse anayibera Kapiteni

Amwe mu mafoto ya Bonaventure Hategekimana Gangi:

Yakiniye Ikipe y’Igihugu Amavubi igiye kinini

Gangi ni umwe muri ba myugariro bakomeye u Rwanda rwagize mu mateka

---